[color=red]المريخ يهزم الهلال بهدف طمبل [/color]

فاز المريخ علي الهلال في مباراة القمة المؤجلة ضمن الدورة الاولي للدوري الممتاز بهدف قاتل سجله مهاجمه البديل هيثم طمبل في الدقيقة 89 من عمر المباراة بعد ان سيطر المريخ علي مجريات الشوط الثاني خاصة في الدقائق الاخيرة للمباراة .وسط استسلام لاعبي الهلال وكان الهلال هو المبادر في الهجوم في الشوط الثاني واضاع احمد عادل وكليتشي هدفان محققان .[img]1218135384[1][/img]

Admin عدد الرسائل : 81 تاريخ التسجيل : 23/07/2008

بسم الله الرحمن الرحيم

ههههههههههه

والله اليوم دا الليله ما طبيعي ...

السلام عليكم اول شيئ ...

انا مرقتا من البيت الساعه 4 قلتا الحق احجز جانبيه في الاستاد نشوف الكورة دي ...

اصلا الكهربا عملتا معانا وقطعت ( كالعادة )

اها يا زول ركبتا ليك الحافله ..

الجماعه الجواها شكلهم برضو الظاهر ماشين الكورة معاي اتنين لابسين طواقي وشايلين وشاحات حمرا وزرقا...

الاول مريخابي بيقول للهلالابي : الليله العجب حيوريكم العجب ..

الهلالابي مبسوط ردا عليهو : أفياني عالم تاني ..

واحد جاهم ناطي في الموضوع : بس لما تتغلب اوع تنسحب ...

الهلالابي مبسوط قال ليهم : طيب لما انتو تتغلبو ما تجرو وتتدبو ( تتدسو لمن لم يفهم )

وبدو النقاشات بيتكلمو زي نسوان الحلة كل زول ما عارف سامع التاني كيف

خمسة سنة وصيف وداك بيقول ليهو صفر دولي وما عارفين تجيبو بطولات والحنك البيش داك ..

زول بيتكلم معاك في الدوري الممتاز يشبكك صفر دولي

يازول نزلتا منهم ومشيت علي الاستاد ..

البيقرا سورة يس والبيودع صحبانو برا

وكان في زول في البوابة ماسك ليهو مبخرة وبيبخر الناس الداخله تقول ابليس جاي يحضر الكورة

وناس بتصهلل من قبل ما الكورة تبدا ..

وناس ماسكاهم النوبة وبيجعرو

ععععععععععععععععععععجب

عععععععععععععععععععععععجب

وناس جايطة غايتو منظر تقول الناس دي داخلة امتحان فيزيا ما كوورة ...

اها حجزنا وقعدتا شعبيه

وحظي التعيس مالقيت طريقة إلا شعبيه مريخيه

قلتا ما مشكلة نقعد جنب الوصيف نشوف الرجفي بتاعهم

مما شافة الحكم دخل .. دا شنو الحكم المرض دا ياخي ...

تاح تراح ( ضرب كفين يدو بي بعض تحلف تقول صوت رصاص اظنو الاخ شغال حداد )

دا حكم تجيبوهو

والله الليله يعمل حركاتو دي الا أبيتو في احمد شرفي ...

واحد نطا قال ليهو واحمد شرفي يبيت وين ..

الناس اتفقعت من الضحك ..

الجنبي تلفونو ضرب

ألوووووووووووو

اسمعي يا مره هوووي الكورة دي حتبدا بعد شوية بلا زبادي بلا كلام فارغ

هسي دا وقت زبادي دا ... خليهو ينوم خفيف ياكل السم اليهري بطنو ...

في سري قعدتا افكر يا ربي المرة هسي زنبها شنو كل الطلبتو زبادي

بعدين اصلو راجلا دا قاعد في مسجد الخليفة ؟ ما يشتري ليها حاجات العشا من بدري ...

المهم قاعدين كدا اللعيبه دخلو الناس قامت تصفق وتصفر وتغني ناس بتغني والله تحلف تقول دي حنة

وناس بتزغرد ( أي والله سمع اضاني ايووووووووووي قوية كدا ) وحات الله في عرسي ما سمعتا اقوي منها

العجب جاكم يا عيني انا امشو بلو راسكم يا عيني انا

وحاجات تانيه كدا ما بتتقال في منتدي محترم زي دا ...

غايتو الزول القدامي دا مما الحكم صفر والكورة دورت بقا بيفكفك زراير قميصو

الجو اعتقد ما كان حار بس اظنو الراجل مسخن من جوا ...

انا قلتا الكورة دي لو الهلال غلب

الزول دا بيمرق يا مولاي كما خلقتني وبيركبنا البوكس ساكت ...

غايتو مع كل هجمة الناس تكورك واااااااااااااااي

مع انو الهجمة لصالح المريخ ...

وناس تكورك لما زول يشوت وتمرق آوت : نقط نقط ووووووووووووووووط أح ح ح ح آوت

وناس بتدعو يا الله قوون .. يلا يا عجب يلا يا طمبل

يلا يا ايفوسا .. يلا يا ايداهو .. يلا يا نصر الدين ...

ما خلو زول ما حركوهو ... الفي والمافي ...

غايتو في ناس استلمت موسي الزومه واي لاعب هلالابي بيجي ماري بي جنبهم ..

اصحي يا موسي .. ما تخليهو يا موسي اقع بيهو يا موسي ..

اول مرة اشوف لاعب كورة بيطير جوز عيني عينك والحكم بيقول رمية تماس

قالو الجماعه عينو ليهم حكم تنزاني في كورة شبيبة القبائل ...

الرزق من الله ...

المهم ناس الشعبيه ديل بيكرهو ليك اللاعب البيجي بي جنبهم السودان والدول المجاورة

وبيسمعوهو الفاظ لو سمعوها المشرفين هنا مش يختو طبله في الموضوع

والله يختو فيهو جنزير عديل ..

ما اطول عليكم ..

ننط طوالي للدقيقة الجا فيها القون ..

الجنبي كان بيخت السفه ( بالهنا والشفا بلعا وكورك قوووووووووووووون )

القدامي القبيل كان فاكي نص زراير القميص ما كضب

الكبريته يا عثمان

شختا ليك في قميصو

امانة ما القميص ولع بوليستر نضيف

حمدتا الله الراجل بي فنلة داخلية يعني حينستر وهو مارق ...

لانو عاينتا وراي لقيت الوراي حارق العمة حقتو برضو

حسيت بي روحي قاعد في ساونا والله

وعرفتا شعور الفرخه البتتختا في السيخ ...

بس بعد داك الجماعه مسكتم الحاله ..

عزو يا عزو طمبل بيهزو ..

طمبل طمبل طمبل طمبل

انا قلتا الناس دي جنت ولا شنو ...

الشريط علق في كلمة طمبل دي لغايت ما الحكم صفر ..

الزول الجنبي القبيل قطعو جاف مع المدام في الزبادي ..

ضرب تلفون : قولي لي مهند ما تنوم الليله ابوك جايب ليك سمك عجالي نضيف ..

حمدتا الله لانو اتخيلتا في من الخرتمية نفر القاعدين ديل في حلالت زي دي برضو

بتكون الاسرة عشاها متوقف علي كورة المريخ المريخ غالب عشا كارب

المريخ مغلوب النوم من المغارب ...

مرقنا من الاستاد كالعادة حصلت شكلة وضرب ( عادي )

ولي قدام كدا في عربية قزازا مكسر وراجل مسكين كدا كل زنبو انو عربيتو لونا ازرق وهو لابس قميص ابيض ...

الجماعه ما شافو حاجة حمرا يعرفو بيها معزورين ...

برا الملص الياهو دور ...

واقفين في الزلط تيت تيت وبينططو في البكاسي والماعندو بوكسي طالع في السقف بتاع العربيه

وبعدين في ناس بيوزعو مسامير بيقولو دا قون طمبل ...

وناس ماسكه فنيلة طمبل وبتكورك

علينا جاي علينا جاي سيكافا علينا جاي ..

علينا جاي علينا جاي .. الممتاز بي جاي ..

وقافلين الشارع ومناظر تانيه آخر حضارية ...

راكب الحافله وراجع الهلالاب كانو كاسرين في زول اظنهم اغلبيه في الحافلة

بالله دا حكم دا .. اللاعب يشيل الكورة بي يدو

دي كورة ولا باسكت ..

وقفنا في موقف كدا تقاطع جنبو مطعم بتاع المطعم خاتي صحانة بتاعت بليله ..

وبيكورك دي بليبة طمبل الهلالابي ما ياكل بتجيب ليهو المغص ...

واحد هلالابي سخن ارح يا حاج ( وجرا ابو داؤود لي طمبل ولي البليلة )

القاعد جنبي كان ساكت من الاول

شاف البليله طوالي مدا يدو بالشباك واتناول صحنين اداني انا واحد ..

زول مجنون بيوزع بليله وانا جعان سبب واحد يخليني ما آكل مافي ...

قلتا ليهو هلالابي ولا مريخابي ..

قال لي ولا عندي علاقة بالكورة السودانية ..

اشرتا ليهو للهلالاب القاعدين ورا وبيحدرو لي وليهو ..

اقنع الشباب الورا ديل بي كدا ...

صحبك اتلفت ورا وعاين لقاهم ليك عيونهم حمرااااا رجع تاني ومدا الصحن بالشباك

يا حاج البليلة دي مسيخه مالا زي قون طمبل ...

الضحك شرطني ...
نقلاٌ من منتديات كووورة