عيوشة
محمد الحسن حسن سالم (حميد)
منبوشة .. منبوشة
نبشوها قبالك .. بت حالا زي حالك
عودها إنبعت حرقان .. زي شتلة معطوشة
عينيها رماشة .. أم لمبة فتاشة
من طاقة جاتا الريح
كتر البكا .. التجريح
خلاها دعموشة
تلوشة .. واللا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها .. عيوشة .. عيوشة
الليل هديماتا .. وشمش الله برطوشة
تشرب من الشارع .. تاكل من الكوشة
عيوشة .. عيوشة
وترقص لهن رقبة ، صقرية ، جابودي ، السامبا .. كاروشة
عيوشة .. جامايكا .. الهورس عيوشة .. اسلولي عيوشة
وعيوشة ما بترقص .. لكنها الدوشة
وتفلت من الشفع
في الفلتة تترتع ..
تدخل على بيتاً .. ستاتو منمدِّي .. ناساً بعرفوها
لكن بعافوها
دايرين غسيل عدي .. شاكرين يا دقلوشة
ويدوها عيشايي بي دمعة مرشوشة
وتنملك الشارع .. خطواتا مربوشة
السوق مع الأطفال .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
على قدر ما كاست .. عينيها ما لاقت غير مطبقة وبصلة
المطبقة انهردت .. والبصلة مقروشة
ما قلنا مغشوشة
غشوها قبالك .. ديشك يا عيوشة
يا الحاضر الغايب .. في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة .. بي فضلة في مطعم او برتكانايتاً ضرباني في كوشة
والليلة بانت زي .. بيتاً في آخر الحي .. ناساتو منبوشة
يا جرحنا الحايم .. طول النهار هايم
يلبد إذا ما شاف صحبانو مكشوشة
يضحك إذا الكومر .. قبل على كوبر
واللا المديرية .. ينمطق الفرحة .. بس فرحة مغشوشة
إن تنجا من كشة .. دردير وتلتيلة ..
كيف تنجا من جوعة .. من بردها وليلا
عزت برنداتا واوكارها مطروشة
بيت الله قافلنو
مستشفى غافرنو .. ساحاتو مرشوشة
كم يوم يعز النوم
رغماً عن المشموم .. والدوخة والدوشة
دي مدينة ما هيلك
مافي البيشبهلك .. ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك ..
صمتاً يجيبولك
باكر تلاقيهن .. في وجبة فوق كوشة
جنب مجرى يحكولك
ودونا لي ضابط .. كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا .. حيكومة مربوشة
دايرين شغل .. مافيش
غير نغسل العربات غير نضرب الاورنيش
حمالة .. جرسونات .. شغلاً ما يوكل عيش
وبالحالة دي الكشة
بلدية والبوليس ... مرات يجيك الديش
ما يقبضوا الباعوض .. ما يقبضوا الضبان .. الما بدور فتيش
الارزقي السمسار .. إشمعنى نحنا وليش
إحنا الحرامية واللا البدسو العيش
الزول يخاف يكفر .. يرجع يقول معليش
شقيش تقع شقيش .. حتى السجن مافيش
مافيش يا عيوشة
من تكبر آهة وآه
وآدم بدور حواه
الطيرة بي عشوشة
الفارة بي جحارة .. الكل بي مأواه
وهنا في إبن آدم تاه
ملجاه أرض الله
لا أوضة لا حوشة
يا أبونا يا الأسود
يا أمنا القرقد
يا داجي وين نرقد
جاك المحل قاسيت .. لامن هجرت البيت
حين المطر صديت ..
أو صددوك غصب
دارك لقيتا حرب
كرت عليك فريت .. كان مافي غير تنفد
بي لونك الأسود .. بي شعرك القرقد
وبي فالك الشامخ زي تاج أبو الهدهد
لامن يطير في الجو .. من ها المدن ينفد
حاشاك من عيب تب
لي شينة ما ختيت .. دغري وعراض إيديك
بس كفها إتعود في الأرض يرمي الحب
ما قنبلة وديناميت
جيت المدن لاقيت
من سيدا ما لاقيت
تحرس عماراتو .. عطشان تمسي تبيت
يتربو زي ما ربيت
كم للعرق شديت
زوغت أمن .. كريت
جاملت جاراتو
أو تنوم ترحل لي سيد خلاف السيد
يتغيروا الأسياد .. لكنو نفس القيد
نفس الربط ذاتو
يا ماشي دون راس خيت
وين كنت لما الناس إنقسموا الواطة
في مدن تجز الراس كان سيدو ما طاطا
كت مافي واللا أبيت .. واصبحت مقطوع راس
زيك كتير من ناس لا أوضة لا ضل بيت
وفتحنا لاقيناك .. أول ما شالنا الحيل
بالراحة في ذات ليل
يا أبونا خليناك .. خففنا ليك الشيل
تقلت بنا الخرتوم
وفرنا لقمة عيش .. موية ومحل للنوم
سامحنا .. عافينا .. يا أصلنا الحنّان
غيرنا اسامينا شان نحيا باطمئنان
دينق إنقلب عثمان .. هاشم بدل دلدوم
من وين ؟؟
من ام درمان وناس بيتنا متعارفين
بس لكنة الرطّان تفضحنا .. بعض الحين
وإن كنا يوم في يوم ماشين بننعوّد على لهجة الخرتوم
في ولاد عرب بالكوم
طالعين سوا ونازلين .. يفرقنا إلا النوم
الحالة من بعضا .. مطروش ومطروشة
أكوان ونتقابل .. في كوشة عيوشة
يا التحكي دون تبكي .. وفي وشو بتعاين
شوف فيهو شن باين .. غير دمعة مقشوشة
قشوها ناس أخوان .. أكوان وعيوشة
بي صبر كم طول
على حال حا يتحول
قصر الزمان يا زول واللا الزمن طول
لا بد يتحول
ما فيهو من آلام .. في يوم من الأيام لي دنيا مفروشة
بالعافيي والطعام لي كل فم .. ما دام في غلابة بي ديوشا
ولي غادي فيلا وكتر بوشة
تحت حكام مندلدلة كروشة
فاوة وتفل لاقّي
ونار الغضب باقّي
غالاها محموشة
جرفت لبقة الليل وانطنبجت دنياك لا عينا بي رموشة
الحال حا يتحول .. قصر الزمان يا زول واللا الزمن طول
لابد من فوقة .. ومن تنتهي الدوشة
قولاً قبل قلنا .. وكتين نصر نحيا مافي اليكتلنا
قولك يا عيوشة .. لا نفس طماعة غاشاك ومغشوشة
الدنيا دنيانا
زرع إيدنا تربانا .. لا صيص لا كدموشة
وماك ماشي جيت غاشي .. ليكن ينسبّل
لا كُتّي شحّادة .. نديل وتتوكل
لا جيتنا دنّاعة .. نمسح لك الجردل
أخرت للساعة وتلبت في حوشة
في إيدك المنجل وشوالة مغموشة
ناسي انو مزروبة ..
بي شوك وجنية وحارساها كلوبة
وكلوبة بات ووبة .. ويات لوبة بتحوشة
يا النفسو ماهية
شن جبهة متكية
لي عمة كاكية .. وطاقية طربوشة
جنب جبهة دغرية .. العمة مكوية .. فوق راسو ملوية
ترقش بياض نية .. وبالهيبة منقوشة
زي وشم فوق أكوان .. شلخاً في عيوشة
يا جرحنا الطول
جاييك زمن طيب .. خيراتو ليك أول
صدقني يا طيب .. يا أرض ويا جدول
كارتنو بي معول
والليلي تتجول .. عينيك مدهوشة
من كنت تتسول .. في مدينة ما هيلك ومن كوشة لي كوشة
الإثنين 15 سبتمبر - 2:01
